இந்நாட்டில் வாழுகின்ற அனைத்து மக்களும் ஒரு புதிய அரசியல் மாற்றத்தை விரும்புகின்ற சூழலில் மனோ கணேசனுக்கும் அவரது கட்சிக்கும் அனைவரும் ஆதரவளிக்க வேண்டும் என்று தமிழ் தேசியக் கூட்டமைப்பின் வன்னி மாவட்ட பாராளுமன்ற உறுப்பினரும், கூட்டமைப்பின் ஒருங்கிணைப்புக்குழு உறுப்பினருமாகிய ந.சிவசக்தி ஆனந்தன் வேண்டுகோள் விடுத்துள்ளார்.

நடைபெறவுள்ள மேல் மற்றும் தென் மாகாணங்களுக்கான தேர்தல்களில் ஜனநாயக மக்கள் முன்னணியை ஆதரிப்பது என்று தமிழ்த் தேசியக் கூட்டமைப்பு முடிவு செய்துள்ள நிலையில், அதற்கு மேலும் வலுச்சேர்க்கும் வகையில், வன்னி மாவட்ட பாராளுமன்ற உறுப்பினர் சிவசக்தி ஆனந்தன் விடுத்துள்ள அறிக்கையிலேயே இவ்வாறு வேண்டுகோள் விடுத்துள்ளார்.

அவரது அறிக்கையில் மேலும் கூறப்பட்டுள்ளதாவது,

யுத்தம் நடைபெற்ற காலப்பகுதியிலும், அதற்குப் பின்னரான சூழலிலும் வடக்கு கிழக்கில் வாழுகின்ற தமிழ் மக்களின் பிரச்சினைகளை நாட்டின் ஏனைய பகுதிகளுக்கு மட்டுமல்லாமல், சர்வதேசம் வரை எடுத்துச்சென்றதுடன், மனித உரிமைகளில் மிகுந்த அக்கறையும் ஈடுபாடும் கொண்டு, அவற்றுக்கு எதிரான அநீதிகளை வன்மையாகக்கண்டித்து பல்வேறு போராட்டங்களையும் மனோ கணேசனின் தலைமையிலான ஜனநாயக மக்கள் முன்னணியினர் நடத்தி வந்துள்ளனர்.

இன, மத, மொழி வேற்றுமையின்றி அவர்கள் ஆற்றி வருகின்ற பணிகளுக்கு ஊக்கம் அளிக்க வேண்டியது, இந்நாட்டில் உண்மையான ஜனநாயகத்தையும், மனிதநேயத்தையும், மனித உரிமைகளையும் மதிக்கின்ற அனைவரதும் கடமையும் பொறுப்புமாகும்.

தமிழ் அரசியல் கைதிகளின் விடுதலைக்காகவும், சரணடைந்து, கைது செய்யப்பட்டு காணாமல் போகச்செய்யப்பட்டோரை கண்டுபிடிப்பதற்காகவும், இஸ்லாமிய வழிபாட்டுத்தலங்கள் மீதான தாக்குதல்களுக்கு எதிராகவும், மறுக்கப்பட்ட தோட்டத்தொழிலாளர்களின் உரிமைகளை மீட்பதற்காகவும், ஜனநாயக மக்கள் முன்னணியினர் மிகவும் தீவிரமாக நடத்திய தொய்வுறாத போராட்டங்களை, நாம் நன்றியுணர்வுடன் நினைவு கூருகின்றோம்.

மேல் மற்றும் தென் மாகாணங்களில் உள்ள மக்கள் அனைவரும் இந்நாட்டில் என்ன நடக்கிறது? எத்தகைய ஆட்சி நடக்கிறது? என்பதை அவரவர்களது சொந்த மொழியில் அறிந்துகொள்ளும் வகையில் ஜனநாயக மக்கள் முன்னணி பல்வேறு போராட்டங்களை நடத்தியுள்ளது.

இந்நாட்டில் வாழுகின்ற அனைத்து மக்களும் ஒரு புதிய அரசியல் மாற்றத்தை விரும்புகின்ற சூழலில் மனோ கணேசனின் துணிச்சல் மிகுந்த நேர்மையான அரசியல் பயணம் ஒருவித நம்பிக்கை தருவதாக அமைந்துள்ளது. ஆகவே இந்நாட்டில் வாழுகின்ற சகல இன மக்களும் இதுவரை காலமும் குறிப்பிட்ட கட்சிகளுக்கே வாக்களித்து வந்த நிலையை மாற்றி இம்முறை ஜனநாயக மக்கள் முன்னணிக்கு வாக்களித்து ஒரு துணிச்சல் மிக்க நேர்மையான அரசியல் தலைமையைத்தெரிவு செய்வதனூடாக, எமது உண்மையான விருப்பத்தை சர்வதேசத்திற்கும், உள்நாட்டில் சுயநல போக்குடனும் ஏதேச்சதிகாரத்துடனும் செயல்படும் அரசியல் தலைமைக்கும் தெளிவாகவே எடுத்துரைப்போம்.

மனோகணேசனின் வெற்றியானது இந்நாட்டில் உள்ள சகல ஜனநாயக முற்போக்கு சக்திகளையும் ஓரணியில் திரட்டுவதற்கு வழிவகுக்கும் என்பதை கவனத்தில் கொண்டு, இந்நாட்டில் உண்மையான சமாதானத்தையும், ஜனநாயகத்தையும் நிலைநிறுத்துவதற்கு அவரது கரத்தை வலுப்படுத்த அனைவரும் ஓரணியில் திரள்வோம் என்று, அவர் விடுத்துள்ள அறிக்கையில் கூறப்பட்டுள்ளது.